Gitaho sa Taiwan nga nakit-an niini ang 24 ka mga eroplano sa militar sa China duol sa isla samtang ang usa ka barkong iggugubat sa Canada miagi sa Taiwan Strait, usa ka hinungdanon ug sensitibo nga agianan sa tubig.
Sumala sa usa ka pahayag gikan sa Ministry of Foreign Affairs sa Taiwan nga ang pag-agi sa Canadian naval vessel mao ang una nga transit karong tuiga ug kini nahitabo pipila ka adlaw human ang duha ka barko sa US miagi sa samang agianan.
Ang Taiwan Strait kanunay nga gitabok sa Estados Unidos ug mga kaalyado niini aron ipahayag ang kahimtang isip internasyonal nga agianan sa tubig, nga nakapasuko sa China.
Kahinumdoman nga giangkon sa Beijing ang Taiwan isip kabahin sa teritoryo niini bisan og wala nagmando sa nasud ug padayon nga gihulga nga okupahan kini gamit ang pwersang militar.
Gikumpirmar sa Ministry of Foreign Affairs sa Taiwan nga ang HMCS Ottawa, usa ka Halifax-class frigate sa Royal Canadian Navy, miagi sa Taiwan Strait niadtong Pebrero 16.
Agi’g tubag, gipaambit sa Canada nga nagtinguha kini nga suportahan ang kagawasan, kalinaw ug open trade sa Taiwan Strait.
Samtang, sumala sa datos gikan sa Ministry of National Defense sa Taiwan, 62 ka mga eroplano sa militar sa China ang namonitor duol sa isla sulod sa 48 ka oras, kauban ang pag-agi sa mga barko sa US.
Ang pinakaulahi nga paglihok sa US sa Taiwan Strait nagtimaan sa unang higayon sukad sa administrasyon ni US President Donald Trump, human sa mga pamahayag ni Trump ug Japanese Prime Minister Shigeru Ishiba nga ilang gisupak ang bisan unsang pagsuway sa pag-usab sa status quo sa Taiwan Strait pinaagi sa kusog nga pagpanghadlok.
