Nagpahigayon ang Presidential Office sa Taiwan sa ilang unang tabletop simulation sa mga aksyong militar sa China sa rehiyon aron mapalambo ang kaandam sa isla batok sa “authoritarian expansion”.
Mao kini ang gipaambit sa usa ka security official diin ang mga tabletop exercises usa ka ‘tool’ nga gigamit sa mga strategist aron mahibal-an kung unsa ang mahitabo sa tinuod nga kalibutan nga mga senaryo, pagsuway kung unsa ang reaksyon sa mga organisasyon ug makig-coordinate batok sa usa ka simulate nga hulga.
Matud niini nga ang maong lakang kay nagtumong sa pagpalig-on sa tibuok society defense resilience sa Taiwan atubangan sa awtoritaryan nga pagpalapad sa China ug uban pang mga nasud samtang nagpadayon sila sa paghagit sa international order.
Kahinumduman nga gipakusog sa China ang militar ug politikanhong presyur sa isla niini sa bag-ohay nga mga tuig ug nagpahigayon og tulo ka hugna sa dagkong mga pagbansay-bansay sa militar sukad nga si Presidente Lai Ching-te sa Taiwan nilingkod sa katungdanan niadtong Mayo.
Ug giakusahan sa Taipei ang Beijing sa pagpataas sa gitawag nga “grey zone” nga harasment pinaagi sa pagpadala sa mga eroplano nga iggugubat ug mga barko sa dagat sa palibot sa isla sa Taiwan sa halos kada adlaw.
