CEBU – Nitanyag si Talisay City Mayor Gerald Anthony “Samsam” Gullas og P50,000 nga reward alang niadtong makahatag og impormasyon bahin sa suspek sa pagpamusil nga mipatay sa tag-iya sa tindahan sa Barangay Tabunok niadtong Hulyo 3, 2022.
Kini ang gikompirmar ni Police Lieutenant Colonel Randy Caballes, hepe sa Talisay City Police Station, ug midugang nga ilang naila ang labing menos tulo ka persons of interest (POI) sa pagpatay kang Leonora Carlos, tag-iya sa tindahan nga gipusil atubangan sa iyang tindahan sa Barangay Tabunok .
Gikatahong nitumaw ang mga pangalan sa POI gikan sa mga pamahayag sa mga kabanay sa biktima dihang gipangutana kon duna ba silay ideya kon kinsa ang mihimo niini kang Carlos.
Matod ni Caballes nga duha ka posibleng anggulo ang ilang gitan-aw luyo sa maong pagpamusil: negosyo ug personal nga kalihokan.
Kahinumdoman, nga gipusil sa ulo si Carlos sa wala mailhing mamumuno nga sakay sa motorsiklo atubangan lang sa iyang tindahan sa Barangay Tabunok, Dominggo sa gabii, Hulyo 3.
Gisusi sa mga sakop sa kapulisan ang mga kopya sa security cameras gikan sa duol nga establisemento ug nasakpan sa maong mga camera ang suspek ug gikompara kini sa mga POI.
