CEBU CITY — Gikumpirmar ni Talisay City Mayor Gerald Anthony “Samsam” Gullas nga mobalik sa Sugbo ugmang adlawa ang usa sa mga survivors sa barkong nasangad sa Surigao del Norte.
Nahimong emosyonal ang subling panagkita nilang Jojie Villanueva ug ang pamilya niini sa usa ka tambalanan sa Surigao City.
Usa si Villanueva sa 20 ka mga tripolante nga sakay sa barkong LCT Cebu Great Ocean diin nasangad kini sa nakalabay nga semana gumikan sa dakong balud sa dagat.
Gawas sa financial ug livelihood assistance, nagkanayon usab si Gullas nga mo-abag ang kagamhanan aron ipaubos sa psychological intervention ang maong survivor.
Matud niini nga dili lalim ang nasinating trauma ni Villanueva human nga nag-utaw-utaw kini sa dagat sulod sa pipila ka adlaw.
Gipasalamatan ni Gullas ang mga netizens nga nag-tag kaniya kabahin sa kahimtang sa maong tripolante alang sa dinaliang paghatag og tabang.
Andam gihapon nga motabang ang mayor sa Talisay alang sa mga OFWs kinsang apektado ang ilang kahimtang, ilabi na ning nagpadayong krisis nga dala sa COVID-19 pandemic.
