MANDAUE CITY-Dul-an sa 400 ka mga panimalay ang naugdaw sa sunog nga miigo sa ilawom sa Mactan-Mandaue Bridge sa Barangay Looc, dakbayan sa Mandaue kagahapon, Marso 12, 2024.
Diin 1,537 ka mga indibiduwal ang natala nga nawad-an og panimalay ug 444 ka pamilya ang apektado, ingon man nga ang nasangpit nga gidaghanon lauman pa nga mosaka.
Hinungdan nga daling nimando si Mayor Jonas Cortes nimando sa Department of Social Welfare and Services sa paghimo og profiling, aron masayran ang kinatibuk-ang apektado.
Sa laing bahin, sa pakighinabi sa Bombo Radyo Cebu News Team kang SFO2 Andicoy, gibutyag niini nga mokabat sa P1.2 milyones ang danyos sa maong sunog.
Ilang gipasalamatan usab nga bisan pa niini, wala’y naangol o namatay sa dakong sunog nga miulbo.
Dugang pa sa opisyal nga nilanat og kapin sa duha ka oras una pa hingpit nga napalong ang sunog.
Sa pagkakaron, padayon pa ang ilang gihimong imbestigasyon ug gitan-aw ang tanang anggulo sa posibleng hinungdan sa nasangpit nga insidente.
