DUMANJUG, CEBU — Gipaubos sa mandatory drug-test ang tanang kapulisan sa Dumanjug diin gipanguluhan ni PCPT Eden Rex L. Baguio, Officer-in-Charge diin gipahigayon sa Cebu Provincial Forensic Unit (CPFU) ug Provincial Intelligence Unit (PIU) isip usa ka pamaagi aron mas mapanghingusgan ang kampanya batok sa illegal nga drugas, nga nagtinguha nga magpabiling limpyo ug drug-free ang Dumanjug Police Station.
Matud pa ni PCPT Baguio, ang pagpatuman sa mandatory drug test usa ka pamaagi sa pagpalambo sa ilang kredibilidad ug pagsalig sa publiko nga nagpakita nga sila mismo nagsunod sa mga balaod nga ilang gi-implementar.
Pinaagi niini, mas masiguro nga ang Dumanjug PNP magpabilin nga matinuod-anon sa ilang katungdanan ug dili muapil sa bisan unsang ilegal nga kalihukan ilabina sa pag-gamit ug ginadiling drugas.
Kini nga lakang nagpamatuod sa seryosong paningkamot sa kapulisan sa Dumanjug sa pagpakita sa ilang dedikasyon sa pagserbisyo ug sa pagtuman sa balaod samtang gipahingusgan ang ilang mga programa sama sa anti-illegal drug operations ug sa pagpanalipod sa mga katawhan.
Busa, ang Dumanjug PNP magpadayon sa ilang paningkamot sa paglimpyo ug pagtabang sa lungsod aron mapadayon ang usa ka mas luwas ug mas hapsay nga komunidad alang sa mga Dumanjuganons. | via Dumanjug PS
