CEBU CITY-Gi-klaru sa Kadagkuan sa Kapulisan sa Sugbu nga human nahisgutan ang mga concern sa Cebu City Second Chance Center, na desisyonan sa Konseho sa Dakbayan sa Sugbu nga ang Cebu City Police Office ug ang Bureau of Jail Management and Penology (BJMP) na ang mo full take-over pag-abut sa Security niini.
Kini ang gitino ni Cebu City Police Office Director, Police Colonel Ireneo Dalogdog, ug gidugang niini nga ang tanang staff sa Second Chance Center, gihulipan na usab kini gumikan kay nasuta nga adunay kakulang sa seguridad o wala kini saktung kahibalo pag-abut sa pag implement sa seguridad.
Hinungdan nga gipadala na ang walo ka kapulisan nga gikan sa Cebu City Mobile Force Company ug laing walo pa nga gikan sa Bureau of Jail Management and Penology (BJMP), kinsa maoy mo bantay sa Cebu City Operation Second Chance Center.
Nasayran nga adunay pulis atul sa panghitabu, apan wala gitugutan ang kapulisan nga mopadool sa entrance sa maong pasilidad, kini gumikan kay matud pa sa tigdumala sa Second Chance, mahadlok ang mga kabatan-unan nga makakita sa kapulisan gumikan kay adunay armas nga dala.
Hinungdan, nga gihimug-atan ni Col. Dalogdog nga kinahanglang usbon na kining gitawag nila nga ‘psychosocial’ ug kinahanglang pasabtun ang mga kabataan nga ang kapulisan dili angay kahadlokan, inay gihimo lang niini ang ilahang trabahu nga modakop sa mga nakalapas sa balaod.
