Andam na ang mga paralympic athletes sa nasod alang sa 17th Paris Paralympic Games.
Ang tanang unom ka para-athletes ug upat ka mga coach niini motambong sa opening ceremony nga ipahigayon sa Place de la Concorde to Champs-Élysées sa Paris, France sa alas 2 sa buntag sa adlaw nga Huwebes.
Ang mga para-athletes sa nasod naglakip nila ni para-swimmer Ernie Gawilan, para-archer nga si Agustina Bantiloc ug mga kauban nilang si Jerrold Mangliwan, Cendy Asusano, Angel Mae Otom, ug Allain Ganapin.
Uban nila ang ilang mga coaches nga sila Gershon Bautista sa Taekwondo, Jonathan Josol sa track and field, Berson Buen sa archery, ug Brian Ong sa swimming.
Ang presidente sa Paris 2024 Paralympic Games nga si Tony Estanguet niingon nga aron mahatagan og pasidungog ang mga para-athletes, ilang pagahimoan ang opening ceremony sa outdoor venue.
Nanghinaut si Philippine Paralympic Committee President Mike Barredo nga magmalampuson ang mga atleta tungod sa ilang pagkamalahutayon sa matag sporting event nga ilang gisalmotan.
