Cebu City- Pagasugdan na karong adlawa ang tulo ka adlaw nga clean up drive sa 7 ka ektarya nga bahin sa Sumilon Island, lugar nga gikonsiderar nga little Boracay sa Cebu.
Kini subay na sa kamanduan sa lokal nga lungsod sa Oslob, probinsya sa Sugbo kalabot sa temporaryo nga pagpasira sa dive spot ug sand bar area sa mga turista sulod sa 7 ka adlaw para sa ipahigayun nga clean up operation. Diin magsugod ang temporary closure sa maong tourist spot karong adlaw hangtod na sa Abril 16.
Giklaro ni Oslob Mayor Jose Tumulak Jr. nga open for operation gihapon ang resort gawas lang sa dive spot ug sand bar area. Matud pa nga kinahanglan una nga limpyuhan ug papahuwayun ang maong bahin sa isla nga kanunay nga gibisita sa mga turista. Gawas usab sa diving spot ug sand bar area, posible gihapon nga makasulod ang mga turista sa resort ug maka whale watching.
Nakapukaw matud pa sa atensyon sa lokal nga kagamhanan sa Oslob ang mga nakuha nga litrato sa isla human ang holyweek kung diin daghan ang nahibilin nga hugaw o basura.
Gituohan ni Mayor Tumulak nga kung daghang kalat sa basura sa daplin sa baybayun, aduna usab hugaw sa ilalum sa dagat hinungdan nga gub-on sa Philippine Navy ang ubos nga bahin sa dagat. Nasayran nga daghan na nga mga grupo ang niboluntaryo nga mutabang para sa nahisgutang clean up drive.
Giinsistir sa maong mayor nga dili nila paaboton nga masusama sa Boracay ang isla sa Sumilon, nga nahimo na nga pinakadako nga tourist spot sa probinsya sa Cebu.
