Gidayeg ni DSWD Secretary Rex Gatchalian ang Tent City nga gitukod sa Philippine Red Cross tungod sa maayo nga pagkahimo niini, nga adunay target nga 200 ka mga tolda aron puy-an sa mga namakwit nga mga indibidwal.
Si DSWD Secretary Gatchalian niabot sa Bogo City ug nidiretso sa Bogo City Hall diin nakigtagbo ang kalihim sa dose ka mga mayor sa amihanang Sugbo kansang mga lugar bag-o lang naapektuhan sa linog.
Mitambong usab sa ilang tigom si Cebu Governor Pam Baricuatro, diin ilang gituki ang malampusong pag-apod-apod sa 1st wave sa relief goods alang sa mga biktima sa linog.
Dugang pa niya, nunot sa mandato ni Presidente Ferdinand Marcos Jr., sugdan na usab nila ang pag-repack sa mga food packs alang sa 2nd wave sa mga relief goods nga i-release sa mga apektado sa linog.
Diin, ilang gitarget ang 225,000 ka mga relief goods nga mahatag sa DSWD ngadto sa mga biktima nga ilang mahuman sunod semana.
Dugang pa ni Gatchalian nga dili lang mga food packs ang ilang ihatag kon dili lakip na ang emergency cash assistance, bisan og wala niya ibutyag kung pila ang ilang ihatag tungod kay nagpahigayon pa og assessment ang mga LGU aron masuta ang kadaot sa tanang pamilya sa Northern Cebu.
