CEBU CITY-Sugdan na sa Land Transportation Franchising and Regulatory Board (LTFRB-7) ang pagpahigayon ug terminal inspection alang sa umaabot nga holidays subay sa semana santa.
Gipahibalo ni LTFRB 7 Regional Director Eduardo Montealto, Jr. nga inspeksyonon nila ang road worthiness sa mga bus ilabi na kay lagyo ang byahe niini, ingon man ang ilahang pagpahigayon ug road inspection alang na sa tanang mga pangpubliko nga sakyanan.
Matud pa, istrikto nila nga bantayan ang mag-overloading diin delikado gayud kini ilabi na sa mga lagyo nga byahe.
Samtang, gitino usab ni Montealto nga nanghatag na usab sila ug special permit diin ilaha kining gilugwayan gikan sa Marso 31 hangtud na sa Abril 17, 2023 ning kasamtangan nga tuig.
Gilauman sa buhatan nga adunay daghang mga pasahero nga mudagsa ug sayo sa mga terminal gumikan sa umaabot nga long holiday, hinungdan nga mas pahugtan nila ang ilahang mga inspeksyon.
Gitataw usab sa opisyal nga pa-igo ang mga provincial buses nga mo byahe nga mo accomodate sa mga pasahero nga mo uli sa ilahang tagsa-tagsa ka mga probinsiya.
