Gipasiugda ni Atty. Rameses Victorius Gatchalian Villagonzalo, usa ka International Criminal Court (ICC) accredited lawyer nga ang testimonya sa representante gikan sa Philippine Statistics Authority (PSA) giisip lamang nga “standalone testimony” ug dili igo aron pamatud-an nga adunay kwarta nga gigamit sa sayop nga paagi.
Gipunting ni Atty. Villagonzalo ang pipila ka mga importanteng punto nga may kalabotan sa maong butang, diin ang bugtong katuyoan sa pagpakita sa saksi sa PSA mao ang pagkumpirma o pagsertipika sa paglungtad o wala sa mga ngalan nga gisumite kanila basi sa hangyo sa House of Representatives.
Dugang niya nga ang sertipikasyon ug testimonya sa saksi sa PSA dili magpamatuod kung adunay kwarta nga gigamit sa sayop nga paagi o gibalhin sa mga kamot, tungod kay wala siyay personal nga kahibalo sa transaksyon sa pondo.
Mao nga gikinahanglan ang ubang ebidensya tungod kay kini giisip lamang nga “stand-alone testimony,” ug ang prosekusyon kinahanglan nga ikonektar kini o “itahi” kini uban sa ubang mga saksi ug ebidensya nga ilang ipresentar.
Gipadayag usab ni Atty. Villagonzalo, nga dili magamit o makabarog nga ebidensya batok sa Bise Presidente ang mga giakusar nga anomaliya sa mga pirma o pondo.
Sumala ni Atty. Villagonzalo, kung moingon ang kampo sa Bise Presidente nga adunay mga pirma nga managparehas apan gikan sa nagkalain-laing tawo, sila mismo ang kinahanglang magpakita og ebidensya sa maong sirkumstansya o kung kinsa ang nagbalibad nga peke kini.
Tungod niini, gipatin-aw sa abogado nga lisud dawaton ug gamiton ang maong mga pasangil sa legal nga aspeto batok sa Bise Presidente tungod sa kakulang sa konkretong ebidensya gikan sa ilang gitudlo nga mga buhatan.
