Gihulagway sa International Criminal Court (ICC) accredited lawyer nga si Atty. Rameses Villagonzalo nga “hilaw” ug “immaterial” o walay direktang kalabotan ang testimonya sa unang witness nga gipagawas sa depensa labot sa Statement of Assets, Liabilities, and Net Worth (SALN) ni Vice President Sara Duterte.
Kini human opisyal nga miatubang si Davao City Assessor Engr. Jaime G. Adalin isip unang saksi sa depensa samtang nagpadayon ang impeachment trial ni Bise Presidente Sara Duterte.
Sumala ni Atty. Villagonzalo, bisan pa man kon usa ka opisyal nga assessor ang maong saksi, ang sakop sa iyang mga dokumento ug testimonya kinahanglang limitado lamang sa mga assessed value sa mga propedad nga nakabase sa gidala niining mga tax declaration.
Gipasabot sa legal expert nga napakyas ang saksi nga ikonektar sa kompetenteng paagi ang maong mga dokumento sa SALN sa Bise Presidente.
Tungod niini, nagpabilin nga kulang-kulang ug walay legal nga gibug-aton ang nahimong testimonya batok kang VP Sara.
Ingon man nga tungod sa maong gintang sa ebidensya ug kapakyasan sa paghimo og direktang koneksyon, giinsistir sa abogado nga nagpabiling huyang ug immaterial ang argumento bahin sa maong hisgutanan.
