‘Fake News’ matud pa ni Lapu-Lapu City Mayor Junard Ahong Chan ang mikatap karon sa social media nga usa ka text diin nag-ingon nga dunay nagpositibo sa N-Cov sa dakbayan sa Lapu-lapu.
Sa pakighinabi sa Bombo Radyo Cebu lang Mayor Chan sgisaysay niini nga subay sa mga measures nga gihimo karon sa matag LGU ingon ang kinatibuk-ang probinsya sa Sugbo, ang Lapu-Lapu City usab ang dunay gi-umol nga hotline kung diin ang mga hotels mutawag ngadto kanila kung duna’y mga customer nga maghilanat og flu.
Gitataw ni Ahong Chan nga dunay usa ka hotel nga nanawag gumikan kay gihilantan ang 3 anyos nga batang gikan sa Guangzhou, China — kasikbit sa Wuhan kung diin nagikan sa Virus.
Dali dayon kini nga gi-adto sa DOH ug gimonitor.
Sa migawas nga resulta negatibo ang maong mata sakit nga related sa N-Cov.
Boot lamang nga klarohon sa mayor nga nanagana ang dakbayan apan dili usab maka-angayon nga mutoo gilayon sa mga peke nga mga taho o balita.
‘Wala mi nagkuwang’
Gihimug-atan ni Chan nga wala sila nagkuwang sa paghatag og kasayuran ngadto sa mga Oponganon, subay na sa hulga sa 2019 novel coronavirus.
Matud ni Chan nga nabalaka kini sa posibleng epekto sa katawhan, bisan pa man sa pagka-mild sa maong virus itandi sa uban pang coronavirus.
Gihimug-atan sa mayor nga ilang gisubay ang sitwasyon pinaagi sa pagpakig-alayon sa Department of Health, Mactan Cebu International Airport, ug uban pang mga ahensya nga nagbantay niini.
Aduna silay gitagana nga focal person sa matag barangay kinsa nga himoong dangpanan alang sa posibleng mataptan sa maong sakit.
Samtang nanghatag ang City Government og libreng face mask ngadto sa mga konstitwente kinsang naglisud sa pagpangita niini sa mga drugstores.
Matud pa usab ni Chan nga naka-purchase sila niini direkta sa mismong supplier aron nga aduna silay mahatag ngadto sa katawhan.
Aron makakuha ang iyang mga residente sa libreng face mask, kinahanglan silang modangop sa City Health Office.
Tipik lang kini, matud pa, sa ilang mga lakang aron kalikayan ang pagkatap sa maong makalilisang nga sakit. (GN/FDP)
