Gikatakdang makigstorya si Thailand caretaker Prime Minister Anutin Charnvirakul kang US President Donald Trump kabahin sa nagpadayon nga panagbangi sa utlanan tali sa Thailand ug Cambodia.
Sumala sa Thai PM, siya ug si Trump mag-istoryahanay sa telepono gahapong adalawa, Biyernes, Disyembre 12 lokal nga oras, ug ang tumong sa US President mao ang pagpataliwala pag-usab aron mahunong ang away ug maluwas ang ceasefire nga iyang gipasiugdahan sa dihang unang miulbo ang panagbangi tali sa Thailand ug Cambodia niadtong Hulyo ning tuiga.
Subay niini, nisaad si Trump nga tawagan ang mga lider sa duha ka nasud aron sulayan nga mahunong ang away, gani, niadtong Huwebes, kauban sa Congressional Ball, gipasigarbo ni Trump ang iyang mga nahimo isip usa ka global peace-maker diin iyang giingon nga ilang nasulbad ang walo ka gubat ug nagpahayag sa pagsalig nga ang ceasefire tali sa duha ka nasud sa Asya mapasig-uli.
Mahinumduman nga ang away miulbo pag-usab sa utlanan tali sa Thailand ug Cambodia human ang kasabutan sa ceasefire nga gipasiugdahan ni Trump niadtong Oktubre nalapas human kini gisuspinde sa Thailand niadtong Nobyembre human sa pagbuto sa landmine nga nakaangol sa usa ka sundalong Thai, usa ka butang nga gihimakak sa Cambodia.
