CEBU CITY — Gihangop sa mga sakop sa Basilica Minore del Sto. Niño ang ilang espesyal nga bisita nga mao mismo ang prinsesa sa Thailand.
Nagsuroy-suroy sa maong simbahan si Princess Maha Chakri Sirindhorn kuyog ang 57 ka mga royal guards isip kabahin sa ilang educational tour.
Una niini, si Rev. Fr. Ric Anthony Reyes, OSA mismo ang unang misugat ngadto ni Princess Sirindhorn.
Gawas sa bantugan nga simbahan, gilibot nilang Princess Sirindhorn ang palibot sa Sto. Niño Pilgrim Center, ingon man ang Magellan’s Cross.
Matud ni Princess Sirindhorn, nga makatabang ang ilang pagsuroy-suroy aron masabtan sa iyang mga estudyante nga royal guards ang Kristyanismo.
Dugang pa sa sakop sa Thai royal family mas gipatigbabaw ang maayong relasyon ngadto sa isig ka tawo bisan pa man sa kalahian sa ilang pagtuo.
Nasayran nga nagdominar ang relihiyon nga Buddhism sa Thailand.
Samtang giselebrar sa mga Sugbuanon ang 500th anniversary sa pagkatukod sa Kristyanismo sa Pilipinas karong 2021.
Milanat og kapin usa ka oras ang pagsuroy-suroy sa delegasyon sa Thailand sa tibuok compound sa Basilica.
