Nagkauyon ang Thailand ug Cambodia sa usa ka hinanaling ceasefire sa ilang utlanan gahapong adlawa, Sabado, Disyembre 27.
Sa usa ka hiniusang pahayag, ang duha ka nasud misaad nga tapuson ang mga semana sa makamatay nga mga panagsangka sa utlanan nga nakapatay sa 101 ka mga tawo ug nakapahawa sa kapin sa tunga sa milyon nga mga tawo sa duha ka nasud.
Ang kasabutan sa ceasefire gipirmahan ni Thai Defense Minister Natthaphon Narkphanit ug sa iyang katugbang sa Cambodia, Defense Minister Tea Seiha.
Sumala sa Thai ug Cambodian defense ministers, ang duha k habig miuyon nga ipadayon ang kasamtangang pag-deploy sa ilang mga tropa nga wala’y dugang nga paglihok, lakip ang tanan nga klase sa ilang mga hinagiban, ingon man ang paghunong sa mga pag-atake sa mga sibilyan ug imprastraktura.
Ang ceasefire nagsugod sa udto sa Sabado lokal nga oras, ug kung ang ceasefire magpadayon sulod sa 72 ka oras human kini mo-epekto, ang Cambodian Defense Minister Tea Seiha miingon nga ang bahin sa Thailand buhian ang 18 ka sundalong Cambodian nga ilang nadakpan sa miaging mga panagsangka.
Ang kasabutan naglakip usab sa pagtugot sa mga sibilyan nga nagpuyo sa utlanan nga makabalik sa ilang mga pinuy-anan sa labing paspas nga panahon, ug ang duha ka nasud miuyon usab nga magtinabangay sa mga paningkamot sa pag-deminate ug pagpakigbatok sa cybercrime.
Naabot ang kasabotan human sa hugot nga panagsultihanay sa kalinaw tali sa duha ka silingang nasud human miulbo pag-usab ang tensyon sa ilang mga utlanan sa sayong bahin sa Disyembre ning tuiga.
