CEBU CITY- Nagmalinawon anggipahigayong tibuok adlaw nga lihok-protesta sa nagkadaiyang grupo sa Sugbo atol sa pagdunggan sa singgit sa nasudnong adlaw sa protesta batok kurapsyon niadtong adlawng Dominggo, Septiyembre 21, 2025.
Kini ang gipamahayag nui Cebu City Police Office Spokesperson Police Captain Charisma Gonzales atol sa eksklusibong pakighinabi sa Bombo Radyo Cebu News Team diin sumala pa nga ang kapulisan sa dakbayan sa Sugbo nakaandam ra sa tulo ka serye sa lihok-protesta nga nahitabo sa syudad, una sa dalan Colon pag Dominggo sa buntag sa mga progresibong grupo, ikaduha sa mga nagpakabanang grupo sa Plaza Independencia, ug ikatulo ang Cebu Edition sa Trillion Peso March sa Fuente Osmeña Rotunda sa mga hugpong sa kabatan-onan, sektor sa simbahan, ug uban pa.
Walay miusa ka natalang kagubot ug pagkaangol sa habig sa mga malinawng nagprotesta ug sa mga kapulisan sukwahi sa nahitabo sa kaulohan diin adunay mga anarkista ang nahimong bayolente.
Gibana-bana sa CCPO nga 350 ka mga demonstrador ang nisalmot sa Plaza Independencia samtang 400 sa Fuente Osmeña Rotunda nga gikan sa mga nagkadaiyang mga dapit og tapok sa grupo og organisasyon sa ilang martsa sauptown ug downtown Cebu.
Natapos og hingpit ang demonstrasyon pasado alas 7 sa kagabhion sa maong adlaw.
Mipadangat og pasalamat ang Cebu City Police sa mga nisalmot sa lihok-protesta diri sa dakbayan sa Sugbo sa ilang pagtuman sa pasaad sa hapsay ug malinawn nga pagpadayag sa katungod nga nakalagda sa Konstitusyon sa gawasnong pagpamahayag sa kasugmuyo sa kasaypanan sa kagamhanan.
