CEBU CITY – Patay ang usa ka lalaki human matud pa nakigpinusilay sa mga pulis sa may Cebu Archbishop Palace.
Giila ang lalaki nga si Jeffrey Mendoza Cañedo, 41 anyos ug residente sa Brgy. Labangon niining dakbayan sa Sugbo.
Matud ni PRO-7 Regional Director PCSupt. Debold Sinas basi sa ilang imbestigasyon nga miadto si Jeffrey sa Palace ug matud pa nga suko kini ug susamang wala sa maayong panghunahuna ug gipangita si Archbishop Jose Palma ug ang uban pang mga pari.
Tungod niini nahadlok ang secretary sa Palace sanglit nakita niini nga nagluklok ug pusil ang maong lalaki hinungdan nga sekreto kini nga mitawag og police assistance. Sa dihang mi-responde na matud pa ang mga pulis, giingong wala nagpapugong si Jeffrey.
Gihangyo pa matud kini sa kapulisan nga musurrender apan isog gihapon si Jeffrey ug mihulbot sa iyang pusil ug nagpabuto. Nagpabuto usab ang mga pulis hinungdan nga nagbinaylo-ay sila og pabuto. Naigo matud pa pa si Cañedo ug namatay.
Gitan-aw sa kapulisan nga posibleng ‘disoriented’ ang maong lalaki.
Nagbutang na usab karon og dugang nga mga security personnel sa Acrchbishop Palace ug padayon pa nga gi-imbestigaran ang maong panghitabo.
