PROVINCE OF CEBU-Nagtingkagol na karon sa prisohan ang 54-anyos nga lalaki nga taga Sibonga, Cebu, human kini gikatahong mitug-an sa pagpatay sa iyang magulang nga babaye.
Giila ang suspek nga si Mario Ramil Nadela,54, kinsa nasikop niadtong Lunes sa hapon, Hulyo 17, 2023, tungod sa giingong pagkulata sa iyang 74-anyos nga igsuong babaye hangtod namatay kini nga giilang si Avilina Nadela Alferez.
Gibutyag sa hepe sa Sibonga Police Station nga si Police Captain Fort Antony Valdez, nga nakadawat sila og tawag sa telepono gikan sa usa ka concern citizen mga alas 4:00 sa hapon, nga nagpahibalo kanila bahin sa usa ka patay nga babaye sa gawas sa balay sa biktima.
Sa ilang pag-abot, ilang naabtan si Alferez nga wala nay kinabuhi nga gitabonan sa rubber mat, ug nagbuy-od sa kaugalingong dugo.
Samtang adunay, usa ka bystander nidala sa kapulisan ngadto kang Nadela, kinsa nitug-an kanila nga siya ang manghod sa biktima.
Matod ni Valdez, namatikdan sa mga imbestigador ang kadudahan nga kinaiya ni Nadela sa dihang nagsugod sila sa pagpangutana kaniya.
Hinungdan nga ilaha kining gipangutana kon nganong aduna siyay mga pinaakan sa iyang wala nga bukton, ug mga bun-og sa iyang ulo.
Nagduha-duha ang suspek sa pagtubag sa mga pangutana sa kapolisan apan sa ngadto-ngadto mitug-an kanila nga siya ang nagpatay kang Alferez, ug midugang nga sila nagkalalis sa wala pa mahitabo ang krimen.
Dugang pa, si Nadela dayag nga niangkon nga gibunalan og gahi nga butang ang ulo ni Alferez sa makadaghang higayon tungod sa kasuko ug ang maong mga bun-og miresulta sa kamatayon sa tigulang nga babaye nga nakaangkon og grabeng samad sa iyang ulo.
Nikompirmar usab ang Scene of the Crime Operatives (SOCO), kinsa mi-proseso sa crime scene, nga adunay daghang grabeng samad sa ulo ang biktima.
Sa kasamtangang si Nadela gikustodiya sa Sibonga Police Station.
Sa laing bahin, ang kapulisan nagkanayon nga padayon pa nilang gisusi ang motibo ug uban pang sirkumstansya sa krimen.
