Gikumpirma mismo ni Police Regional Office (PRO) 11 Regional Director Police Brigadier General Leon Victor Rosete nga gipasakahan na og kasong murder ang usa ka lalaki nga senior citizen nga miuli sa nakit-ang ID atol sa pag-live ni Barangay Captain Dodong Bucol sa pinoy-anan niini sa Brgy. Tres de Mayo, Digos City.
Sumala ni General Rosete, gawas sa maong senior citizen, lakip usab sa gipasakahan og kasong murder ang tulo pa ka wala hinganli nga mga lalaki nga giingong adunay kalambigitan sa pagpusil-patay kang Kapitan Bucol niadtong November 25, 2025.
Dugang pa ni Rosete nga ang kaso gipasaka sa pamilyang Bucol niadtong Pebrero 27, 2026, batok kang Silvestre Dericho ug sa laing tulo ka mga suspetsado nga giingong sakay sa usa ka pulang Toyota Innova sa higayon sa krimen.
Sa karon, gipaabot na lamang sa kapulisan ang pagpagawas sa korte og warrant of arrest batok sa mga suspetsado.
Matod pa ni Rosete, bisan pa sa maong kalamboan sa kaso, magpadayon gihapon ang imbestigasyon aron matumbok ang tanang posibleng nalambigit sa pagpatay kang Bucol.
