CEBU CITY – Tanggong sa prisohan ang usa ka tindera human nga matud pa nangawat og panty sa iyang gibantayan nga dakong department store sa Barangay Mabolo, dakbayan sa Cebu.
Giila ang tindera nga si Maria, 23 anyos ug 4 ka buwang buntis.
Una niini, nagbantay si Maria sulod department store sa dihang gisingot matud pa ang ilok niini.
Sa imbestigasyon sa pulis, gisaysay niini nga wala siya’y dala nga panyo hinungdan nga gigamit nalang niya ang usa ka panty nga baligya para ipahid sa singot sa iyang ilok. Apan wala niini nabantayan nga nakit-an siya sa gwardiya.
Dali kini nga gi-kompronta sa gwardya ug gipangutana kung unsa ang gigunitan niini. Mitubag ang tindera ug miingong panyo apan wala matud pa mutoo ang gwardiya.
Gidala dayon niini ang tindera sa Mabolo Police Station ug didto nangayo kini og pasaylo sanglit dili man niini intensyon nga mangawat og panty.
Apan nadesisyonan sa management sa mall nga mupasaka sila og kaso batok sa ilang empleyado.
Nasayran nga mukantidad sa P149 ang naasoy nga panty.
