CEBU – Mipahimangno ang usa ka medical expert sa publiko sa mga sakit nga mahimong makuha niining panahon sa ting-uwan.
Gibutyag ni Dr. Rene Josef Bullecer nga karun ang ‘breeding time’ sa mga lamok nga posibling magdala sa sakit nga dengue. Matud pa nga mas daghan ang namatay ug mas delikado ang sakit nga dengue hinungdan nga dili gayud kini angayan nga kalimtan taliwa sa COVID-19.
Sigon ni Bullecer nga wala may Malaria sa Sugbo apan angayan sa gihapon nga mag-matngon ang katawhan, ma-bata man o mga hamtong. Gawas sa dengue, kuyaw usab ang sakit nga liptospirosis karung ting-uwan diin adunay mga pagbaha nga nagdala ug kagaw.
Gipasabot sa naasoy nga doktor nga delikado ang tawo nga adunay samad sa ti-il o bisan asa nga bahin sa lawas nga maabtan sa tubig-baha diin masudlan kini ug kagaw, ug mahimong hinungdan sa typhoid fever.
Manggawas usab panahon sa ting-uwan ang sakit nga trangkaso. Subay niini, tambag ni Dr. Bullecer nga magtumar gayud ug vitamins C, ingon man kanunayon ang pag-inom ug tubig.
