CEBU CITY-Mipahimangno si Dr. Rene Josef Bullecer sa publiko nga angayang magbantay sa dagan sa panglawas ilabina niadtong mga muduaw sa mga nagkadaiyang sam-ang sa adlaw sa mga Santos ug Kalag.
Kini subay na sa weather forecast sa Pagasa nga hilabihan ang masinati nga kainit sa panahon sugod ugmang adlawa hangtod na sa Nobyembre 2.
Gibutyag ni Dr. Bullecer nga gikinahanglang kanunay nga ‘hydrated’ ang lawas hayan importanti ang pag-inom ug daghang tubig.Matud pa nga magbalon gayud ug tubig arun nga dili ma-dehydrate ug malikay sa heat stroke ilabi na niadtong adunay mga highblood.
Sigon ni Bullecer nga pipila na lang karun ang mga sam-ang nga adunay puno-an nga mahimong kapasilongan hinungdan nga mas maayo nga magdala ug payong ug kung ugaling adunay plano nga magdugay o mu standby sa sementeryo, mas maayong magdala ug dakong payong.
Dugang pa niini, likayan ang pagsul-ob ug mga dark color sama sa itom, puwa ug uban pa gumikan kay makadugang kini sa kainit sa lawas.Giingung mas maayo nga magsul-ob ug ‘light colors’ ug hayahay nga matang sa panapton.
Kung mahimo, magbutang usab ug sunscreen nga adunay SPF 30 arun nga malikay sa sunburn o pagkadaut sa panit gumikan sa tumang kainit.
Nagkanayon si Dr. Bullecer nga mas maayong mubisita sa mga nagkadaiyang sam-ang sa wala pa’y alas 8 sa buntag o lapas na sa alas 4 sa hapon arun sa paglikay sa paglagiting nga kainit sa panahon. (SBR)
