TOLEDO CITY, CEBU- Mihatag og tabang ang Toledo City Social Welfare and Development (CSWD) sa tulo ka minor de edad nga saksi sa brutal nga pagpatay sa 12-anyos nga dalagita sa naasoy nga dakbayan.
Sumala ni Jeshyl Paran, head sa CSWD-Toledo, gihatagan sa opisina ang mga biktima og psychological support ug counseling aron matabangan silang makabangon gikan sa trauma.
Giingon ni Paran nga ang epekto sa insidente dili lamang makita sa mga biktima, apil usab ang pamilya ug ang komunidad.
Gipasiugda niya nga importante nga tabangan usab ang mga bata ug mga magtutudlo nga naapektuhan sa ingon ani nga krimen.
Gidugang pa niya nga nagplano ang CSWD og dugang mga programa aron suportahan ang mga minors nga naapektohan sa mga krimen ug malikayan ang dugang psychological trauma.
Kahinumduman nga nakaplagan nga wala nay kinabuhi ang 12-anyos nga batang babaye sa hilit nga lugar sa utlanan sa Barangay Ibo ug Cabitoonan, Dakbayan sa Toledo, niadtong Miyerkules, Pebrero 19, 2026.
Sumala sa saksi, usa ka iro ang nakadala sa usa sa mga parte sa lawas, nga nag-aghat sa pulis sa mas lawom nga imbestigasyon, diin nakaplagan ang dugang nga mga parte sa lawas sa biktima.
Pinaagi sa pagrepaso sa CCTV footage ug mga ebidensya gikan sa mga nakasaksi, dali nga nailhan ug nadakpan sa pulis ang usa ka hamtong nga lalaking suspek.
Ang suspek karon gibilanggo sa Toledo CPS custodial facility samtang nagpadayon ang mga imbestigador sa pag-andam sa kaso.
