CEBU CITY-Gikakugang sa mga lumulupyo sa Toledo, City, Cebu ang pag-uwan og ice sa ilang lugar kagahapon sa hapon sa may Luray II, Toledo ug ingon man nasinati sa Carmen Copper Corporation sa Lutopan.
Kini ang gibutyag ni Nilo Marata kinsang nag-upload sa video nga makita ang pag-uwan og ice ug mikatap na kini sa internet.
Matud ni Marata nga ang gidak-on sa maong ice sama sa jolen.Pagsaysay pa niini nga sa wala pa mibunok ang uwan nakita nila ang daw sama nga talagsaon nga dag-om ug medyo ubos ang dag-om sa naandan.
Taud-taud pa kalit na kining mi-uwan ug sa wala damha ice ang nangahabong gikan sa kawanangan butang nga ila usab nga gikamangha.
Samtang gitino ni Mio Aguirre sa Pagasa, Visayas nga normal lamang ang maong phenomenon nga gitawag og ‘Hailstorm’ ug wala usab angayang ikahadlok.
Iyang gipasabot nga tungod kini kay miabot sa freezing level ang maong lugar kung diin makamugna og kusog nga pag-uwan ug posible pa nga ice ang mangatagak.
Apan gitino ni Aguirre nga talagsaon lang kini mahitabo ilabina sa tibook Pilipinas tungod kay dili ubos ang freezing level sa nasud.
Nasuta nga ikaduha na kini nga higayon nga nag-uwan og ice diin ang unang natala ang didto sa Pinamungahan, Cebu.
