MANDAUE CITY-Malampusong gisilbi sa mga kapulisan sa Dakbayan sa Mandaue ang warrant of arrest sa usa ka 21-anyos nga lalaki nga taga Bonbon, Butuan City, sa rehiyon sa CARAGA niadtong Hulyo 6 sa Dakbayan sa Mandaue.
Base sa gitaho sa Police Regional Office Central Visayas (PRO-7) nga nasikop sa mga personahe sa Police Station 6 sa Mandaue City Police Office (MCPO), uban sa Regional Intelligence Division ug Regional Police Drug Enforcement Unit sa Police Regional Office 13 (PRO 13), ang No. 2 most wanted person sa CARAGA region, tungod sa krimen nga pagpanglugos.
Nahitabo ang pagkasikop niadtong Hulyo 6 sa mga alas 12:14 sa udto sa Canduman Housing, Brgy. Canduman, dakbayan sa Mandaue.
Ang warrant giisyu sa Regional Trial Court, 10th Judicial Region, Branch 4 sa Butuan City, Agusan Del Norte, ug walay girekomendar nga piyansa.
Anaa na sa kustodiya sa RID, PRO13, ang akusado ug ipresentar ngadto sa nag-isyu nga korte.(PRO7)
