CEBU – Anaa sa mga kamot ni Presidente Ferdinand “Bongbong” Marcos Jr. ang desisyon kung ipadayon o i-postpone ang Barangay ug Sangguniang Kabataan elections (BSKE) karong Disyembre ning tuiga.
Mao kini nahimong pamahayag sa pipila ka top officials sa dakbayan sa Sugbo lakip na si Cebu City Mayor Michael Rama ug Association of Barangay Councils (ABC)-Cebu City President ug Barangay Kasambagan chief Franklyn Ong kalabot na usab sa pipila ka gisugyot nga mga lakang sa pag-postpone sa umaabot nga BSKE.
Diin lakip sa nisugyot nga ipostpone mao si Cebu City North District Rep Rachel “Cutie” del Mar human nisang-at kini og balaudnon sa Kongreso nga magsuspenso sa BSKE nga gikatakdang mahitabo karong umaabot nga buwan sa Disyembre.
Apan sa habig ni Mayor Rama nagdumili kini paghatag sa iyang baruganan sa maong butang ug niingon nga kinahanglang maghuwat ang publiko sa state of the nation address sa presidente.
Samtang alang kang Ong angayang huwaton ug sundon ang bisan unsa nga mamahimong desisyon sa presidente.
Sa pikas bahin, nipadayag sa iyang suporta si Lapu-Lapu City Mayor Junard “Ahong’’ Chan sa panawagan nga suspensuhon ang BSKE.
