Hingpit nang nahawan ang mga kadalanan sa dakbayan sa Mandaue, nga kaniadto puno sa mga ilegal nga naka-parking nga mga sakyanan, kini gumikan sa hugot nga operasyon sa Traffic Enforcement Agency of Mandaue (Team) sa tibuok siyudad.
Sumala sa hepe sa Team nga si Hyll Retuya, ang nagpadayon nga kampanya batok sa ilegal ug overnight parking nakahatag og dakong kalamboan sa pipila ka dagkong kadalanan, diin sukad sa pagsugod sa gipakusog nga pagpatuman niini dul-an 100 ka mga sakyanan ang na-clamp na.
Gibida ni Retuya ang E. Del Rosario St. ug S.B. Cabahug St., duha ka dagkong kadalanan nga kaniadto grabeng bagsagubang sa problema sa mga sakyanan nga naka-parking sa adlaw ug gabii.
Matud sa opisyal nga ang yawe sa kalampusan mao ang pagkamakanunayon, hinungdan nga ang mga enforcement officer nagpadayon sa pagpatrolya ug pagpahigayon og “roaming” operations sa lainlaing mga lugar sa Mandaue matag gabii.
Dugang pa niini nga matag semana, gipalapdan sa Team ang focus area niini ug ang mga operasyon bag-o lang nagsugod sa Looc, diin daghang mga sakyanan ang nakalapas.
Gipasalig ni Retuya sa publiko nga ang ahensya pabiling committed sa pagmentinar sa mga nalimpyohan nga dalan, usa sa mga panaad niini ngadto kang Mandaue City Mayor Thadeo Jovito “Jonkie” Ouano.
Gihimug-atan usab niini nga ang mga dalan ug sidewalk nga gimentinar sa gobyerno alang sa publiko nga gamit, dili alang sa pribadong mga sakyanan.
