Mipahimangno ang Traffic Enforcement Agency of Mandaue (TEAM) sa mga motorista nga mag-andam sa kahout sa dagan sa trapiko, tungod sa mga umaabut nga rehabilitasyon sa mga kadalanan nga buhaton sa Department of Public Works and Highways.
Maapektohan sa proyekto ang bahin sa DM Cortes Avenue sa Barangay Paknaan.
Matud ni Traffic Enforcement Agency of Mandaue Head Hyll Retuya, nga adunay giandam nga mga diversion roads alang sa mga sakyanan nga maglatas sa nahisgutang lugar.
Gipasabot ni Retuya, nga ang bahin sa karsada nga ipaubos sa rehabilitasyon mao ang taytayan sa maong lugar nga wala mohaom og maayo.
Iyang namatikdan nga medyo halapad ang lugar nga i-rehabilitate. Hinuon wala pa gibutyag sa DPWH kung unsa kadugay mahuman ang proyekto.
Sa pagsusi, gibanabana ni Retuya nga molanat og pipila ka buwan una mahuman ang maong proyekto.
Matod ni Retuya nga ila nang gisusi ang posibleng mga diversion road nga mahimong ablihan sa publiko. Tungod kay sirad-an ang southbound lane aron mapataas ang taytayan, ang northbound lane na lang sa tulay ang magpabiling abli.| via Bombo Nathaniel Sandoval
