CEBU CITY-Gipanglantawan nga mamahimong solbad sa problema sa trapiko ug kriminalidad sa Dakbayan sa Sugbo, ang pag-install og mga ‘traffic lights’ ingon man usab ang Closed-Circuit Television (CCTV) cameras.
Mao kini ang gibutyag ni Konsehal Philip Zafra, ang pango sa Committee on Peace and Order sa Dakbayan.
Giasoy niini, nga gumikan sa mga nilabay nga mga bagyo nga niresulta sa pagka-guba sa mga CCTV sa syudad sa Sugbo nga hangtud karon wala pa ma-repair o mailisan.
Gi-isip sa maong opisyal ang kakulangan sa mga CCTV sa Dakbayan, nga hinungdan sa usa sa mga dakong hagit sa seguridad ingon man ang trapiko ning syudad sa Sugbo.
Sa pagkakaron, gi-review na sa executive committee sa Dakbayan ang mga kontrata nga nagmando sa pag-install og mga Closed-circuit television (CCTV) sa Cebu City Transportation Office (CCTO).
Dugang pa niini, nga gipanglantawan nga dako og matabang ang ‘CCTV installation’ sa Dakbayan, dili lang kabahin sa trapiko kung dili lakip na sa ‘peace and order’.
