Gikataho nga gipadala na ngadto sa International Criminal Court (ICC) ang transcript sa Senate hearing niadtong Lunes, Oktubre 28 diin niangkon si kanhi Presidente Rodrigo Duterte sa extrajudicial killings (EJK) sa war on drugs.
Mao ni ang gibutyag sa open critic ni Duterte nga si kanhi Senador Antonio Trillanes IV sa iyang social media account.
Matod ni Trillanes, ang mga transcript sa imbestigasyon sa House Quad Committee kay napadala na sa ICC ug giingong gidawat ang tanan.
Dugang ni Trillanes nga magamit ang mga gisumiter sa saktong panahon sa trial.
Kahinumudan nga atol sa Senate hearing, giangkon sa kanhi Presidente nga adunay death squad nga giingong responsable sa pagpatay sa mga drug suspect niadtong Mayor pa siya sa Davao City.
Ug gikombinsir usab niini ang pipila ka mga opisyal sa kapolisan sa pagpatay sa pipila ka indibidwal nga mga kriminal apan wala sila motuman sa iyang mando.
Gawas niini, giangkon usab ni Duterte nga iyang gimando nga “e-encourage” ang mga drug suspects nga makig-away aron kon sila mag-away, sila mapatay.
Sa laing bahin, si Senate President Francis ‘Chiz’ Escudero niingon sa sayo pa nga wala pay nadawat nga pormal nga komunikasyon ang Senado gikan sa ICC kalabot sa imbestigasyon sa war on drugs.
