Mipahibalo ang Department of Interior and Local Government (DILG)-7 nga i-renew sa mga local government units sa Sugbo ug mga kasikbit nga lugar ang kasamtangang ordinansa nga nag-regulate sa mga traysikad ug traysikel sa ilang lokalidad.
Kini human nga mi-isyu ang DILG central office og memorandum circular niadtong Enero 10 diin mi-awhag kini sa mga local chief executives nga repasuhon ang ordinansa alang sa mga tricycle ug pedicabs nga pinasubay sa standards sa Department of Transportation o DOTr.
Usa niini mao ang paglikay sa mga nahisgutang mga sakyanan nga makabyahe sa mga major roads ug national highways sa tagsa-tagsa ka mga lokalidad.
Matud ni Atty. Kenneth Lucero, ang monitoring and evaluation division chief sa DILG-7, nga ipatuman sa mga mayor ang nahisgutang lakang pinasubay sa Traffic Code sa nasud.
Dugang pa niini nga kinahanglang tumanon sa mga LGUs ang direktiba sa maong ahensya sulod sa 90 ka adlaw.
Kung makit-ang wala gisunod sa LGU ang tricycle ordinance subay na sa patakaran sa DOTr, ideklarar kini og invalid sa korte.
