Nakadani og nakadaiyang atensyon ang maanindut nga pagpasundayag sa Tribu Lumad Basakanon, inila ug garbo nga cultural troupe sa Dakbayan sa Sugbo, human sila nag-perform sa Philippine Pavilion, alang sa 2025 Osaka World Expo sa Japan, Hunyo 7, 2025.
Sa ikslusibong pakighinabi sa Bombo Radyo Cebu team kang Lea Bartiquin, usa sa mga saksi sa maka-ngangha nga pagpasundayag sa maong troupe didto sa Japan, nabutyag niya nga dili mayano-yano ug dili matarog ang kanindut sa nahimong performance sa Lumad Basakanon.
Iyaha usab nga nasaysay nga grabi ang pagdayeg nga nadawat sa mga performers gikan sa mga langyaw nga naka saksi sa ilahang pagpasundayag, kay sumala pa, naka-agni gayud kini og atensyon, ilabi na sa dihang nagsayaw-sayaw na kini sa kadalanan sa Philippine Pavilion, pa ingun na ngadto sa garden, diin sa dihang dapit, mag-abot usab ang nagkalain-laing representante sa nagkalain-laing nasud.
Dugang ni Bartiquin, sa ka maayo sa Lumad Basakanon, adunay mga nitambong nga nisabay ug nisayaw usab, inubanan sa mga performers, kay nabatian nila ang esensya sa maong matang sa sayaw.
Makita usab ni Bartiquin nga sangko sa langit ang kalipay nga nabati sa Lumad Basakon sa dihang ilang gipakita ang kamahinungdanon ug bili nga mga tradisyon sa Sugbuanon ngadto sa tibuok kalibotan.
Sa pikas bahin, nakadayeg usab si Bartiquin ni Christina Frasco ang Secretary sa Department of Tourism kay usa kini ka malampuson nga kalihokan, ilabi na sa pagpakita sa unsa ka tambok ug adunahan nga turismo sa Pilipinas.
Kay sumala pa, gawas sa representante sa Dakbayan sa Sugbo, aduna usab gipada ang DOT nga mga nagkalain-laing represenatante gikan sa Luzon, Visayas, ug Mindanao. | via Bombo Irene Ardiente
