CEBU CITY – Ipatuman na og pagbalik ang Truck Ban sa dakbayan sa Talisay sugod sa adlaw nga miyerkules, Oktubre 7, 2020.
Nalakip sa City Ordinance No. 30, magsugod kining truck ban gikan sa alas 6:00 sa buntag ngadto na sa alas 8:00 sa buntag ug gikan sa alas 4:00 sa hapon ngadto na sa alas 5:00 sa hapon. Kini ang schedule sa pagdili sa pagpabiyahe sa mga truck nga adunay gibug-aton nga 4,500 kilograms pataas sa mga kadalanan sa naasoy nga syudad.
Mamahimong epektibo ang kining truck ban gikan sa adlaw nga Lunes ngadto na sa Sabado.
Sigon pang City of Talisay Traffic Operations and Development Authority (CT TODA) Head Jonathan “Joy” Tumulak nga sukad gipa-ubos ang dakbayan sa Talisay sa Modified General Community Quarantine (MGCQ) nibalik ang paghu-ot sa dagan sa trapiko sa syudad.
“Namatikdan sa atung mga personnel sa Field sukad gipa-ubos sa MGCQ ang dakbayan, nagka-anam anam og balik og dagan ang mga pribado nga sakyanan, pangpubliko nga sakyanan ilabi na gayud nga nagsige og agi ang mga truck,” asoy pa ni Tumulak.
Kini ang nahimong hinungdan nga naka-desider ang lokal nga pangagamhanan sa syudad nga ibalik na ang truck ban.
“Nakita sa atung Mayor (Talisay City Mayor Gerald Anthony ‘Samsam’ Gullas) ug nakadawat na usab kini og reklamo nga nagkagrabe na ang traffic sa Talisay ilabi na sa panahon sa peak hour,” dugang pa ni Tumulak.
Subay niini, gibutyag ni Tumulak nga nagpahigayon na kini og Information Drive ingon man ang pakigtambayayong sa mga negosyante nga nanag-iya ug mga truck o manga hingtundan ahensya nga ma-apektuhan sa maong kamandu-an.
Lakip sa mga truck nga did-an sa pagdagan sa naasoy nga schedule mao ang Cargo trucks;Lorries; Fuel tankers; Liquid carriers; LPG/LNG Tankers; 10,20, ug 40 footer container vans/tractor Cargo trucks ug uban pang mga sakyanan nga adunay gross capacity weight sa mo-sobra 4,5000 kilograms.
Kini ang mga kalsada nga gidili ang pag-agi sa mga truck sa gikatakdang oras: Vicente Garces St.; Rabaya St.; Pulong Deiparine St.; Prisco Deiparine St.; Sangi Road; San Roque – Laray Road; Leoncio Abarquez St.; Sombria – Pooc; Fidel Bas St.; Toledo Wharf Road; Cong. Antonio Bacaltos St.; ug N. Bacalso Avenue.
Sa laing bahin, mag-atubang og tukmang silot ang mga makalapas sa truck ban.
Alang sa 1st offense: P1,500 nga multa; 2nd offense: P2,500 nga multa ug pagka-priso sa driver sulod sa usa ka semana depende na sa desisyon sa korte; 3rd offense: P5,000 nga multa ug pagka-kumpiskar sa drivers license ug pagka-priso sud sa duha ka semana ngadto na sa usa ka buwan depende sa pagbu-ot sa korte.// EKP
