Gimandoan ni US Presidente Donald Trump ang War Department nga ipadayon ang nuclear weapons testing, kini ang unang higayon nga mahitabo human sa kapin 30 ka tuig nga paghunong sukad sa katapusang pagsulay sa armas nukleyar niadtong 1992.
Sa usa ka pahayag, gipasabot ni Trump nga ang lakang gituyo aron makasunod sa mga programa sa pagsulay sa ubang mga nasud sama sa Russia ug China.
Gipasigarbo usab sa Presidente nga mas daghan ug mas kusgan ang mga armas nukleyar sa Amerika kung itandi sa ubang mga nasud, diin ang Russia mao ang ikaduha ug China ang ikatulo.
Wala pa gipadayag ni Trump kung unsaon pagpahigayon sa mga pagsulay, apan iyang giingon nga magsugod dayon ang proseso.
Ang mando gihimo human niya kondenahon ang Russia tungod sa pagsulay sa usa ka nuclear-powered missile, nga gitaho nga adunay unlimited range.
Bisan pa nga giangkon ni Trump nga ang mga nuclear weapons, dakong gahom sa pagguba, iyang giinsister nga wala siyay laing kapilian gawas sa pag-update ug pag-renovate sa arsenal sa Amerika atol sa iyang termino.
Kahinumduman nga ubos sa pagdumala ni kanhi Presidente George H. W. Bush, giisyu ang moratorium sa nuclear testing isip kabahin sa pagtapos sa Cold War.
