Trending karon sa social media ang caption nga “Trump is Dead”.
Kini bisan og ang White House wala nagpagawas og usa ka pahayag bahin sa kini nga butang.
Nagsugod kini sa pag-trending sa internet human ang Presidente sa US nga si Donald Trump wala makita sa publiko sa daghang mga adlaw.
Katapusang nakit-an si Trump sa publiko kaniadtong Agosto 26 sa dihang nanguna siya sa usa ka miting sa gabinete sa telebisyon.
Sukad niadto, wala na siya motambong sa bisan unsang pampublikong mga kalihokan, nga nakapadugang sa mga kabalaka bahin sa iyang nahimutangan.
Bisan pa niini, ang Republican leader nagpabilin nga aktibo sa iyang platform sa social media nga Truth Social, diin siya nag-post kaniadtong Sabado sa buntag ug gisaway ang korte sa US tungod sa desisyon niini bahin sa iyang gipahamtang nga taripa.
Nabanhaw usab ang isyu sa kahimsog sa 79 anyos nga si Trump human bag-o lang namatikdan ang usa ka bun-og sa iyang tuo nga kamot, nga nag-viral usab sa social media.
Ang pagkahanaw ni Trump sa mata sa publiko nalambigit usab sa bag-o lang nga pamahayag ni Bise Presidente JD Vance sa US niadtong Agosto 27 nga andam siyang molingkod sa pagka-presidente kung mahitabo ang “makalilisang nga trahedya” apan iyang giinsister nga ang Presidente sa US “fit and energetic” gihapon bisan pa nga siya miingon nga ang wala damhang mga panghitabo dili isalikway.
