Gipahibalo ni U.S. President Donald Trump nga mopahamtang siya og 50% nga taripa sa mga import gikan sa mga nasud nga nagsuplay og military weapons sa Iran, nga walay eksepsiyon.
Gihimo ni Trump ang pahibalo sa iyang Truth Social media account pipila ka oras human sa duha ka semana nga kasabutan sa ceasefire sa Tehran.
Wala gitino ni Trump kung unsang legal nga awtoridad ang iyang gamiton sa pagpahamtang sa mga taripa, human gibasura sa Korte Suprema sa Estados Unidos niadtong Pebrero ang iyang paggamit sa International Emergency Economic Powers Act (IEEPA) aron pagpahamtang og halapad nga mga taripa sa tibuok kalibutan.
Tungod niini, usa ka ubos nga korte ang nagmando sa pag-refund sa anaa sa $166 bilyon nga nakolekta sa nasud sulod sa usa ka tuig.
Ang balaod sa IEEPA naglungtad sukad pa niadtong 1977 aron suportahan ang financial sanctions batok sa Iran, Russia, ug North Korea, apan ang korte mihukom nga si Trump milapas sa awtoridad niini sa pagpahamtang og mga taripa sa pamatigayon.
Wala usab gitino sa Estados Unidos ang mga nasud nga mahimong mapailalom sa mga taripa, apan ang China ug Russia nailhan nga nagtabang sa Iran sa pagpalig-on sa mga military capability niini, lakip ang mga missile, air-defense systems ug teknolohiya alang sa ilang depensa batok sa U.S. ug Israel.
