Gipasidan-an ni US President Donald Trump nga iyang putlon ang pondo sa Smithsonian Institution, usa ka inila nga museyo ug sentro sa kasaysayan ug kultura sa Amerika, tungod sa giingong pagpakaylap sa “anti-American ideology,” gahapong adlawa, Martes.
Giakusahan niya ang Smithsonian nga giingong nagpasiugda og negatibo nga panglantaw sa kasaysayan sa Amerika, ilabi na sa mga isyu nga may kalabutan sa pagkaulipon.
Sumala sa post ni Trump sa iyang Trust Social, gimandoan niya ang iyang mga abogado nga sugdan ang parehas nga proseso nga nahimo sa mga kolehiyo ug unibersidad diin adunay “tremendous progress.”
Giingon sa White House nga maglunsad kini og internal nga pagrepaso sa daghang mga museyo sa Smithsonian pagkahuman sa mga alegasyon ni Trump.
Samtang, gikondena sa Civil Rights Advocate Group ang lakang ni Trump ug giingon nga ang Smithsonian adunay kagawasan sa paghimo og mga desisyon bisan kung nakadawat pa kini og pondo gikan sa Kongreso.
Mahinumdoman nga sa bag-ohay nga mga bulan, si Trump nag-isyu usab sa susamang mga hulga sa pagputol sa pondo sa mga unibersidad tungod sa mga isyu sa mga protesta batok sa panagbangi sa Gaza, mga polisiya sa transgender, ug mga programa sa pagkaparehas.
