Gidepensahan sa mga opisyal sa administrasyon ni Trump ang ilang paggamit sa talagsaon nga gahum sa gubat aron i-deport ang daghang mga migrante sa Venezuela bisan pa nga gibabagan sa usa ka huwes ang lakang ug gilimod sa Venezuela ang mga pahayag sa mga opisyal sa US nga ang mga deportado mga miyembro sa gang.
Matud ni Attorney General Pam Bondi nga kini ang modern-day warfare ug magpadayon kini sa pakigbosog sa pagpanalipod sa mga lungsuranon sa Amerika sa matag lakang sa dalan.
Dugang pa ni Bondi nga makatarunganon ang desisyon sa administrasyon ni Trump nga i-deport ang 137 ka mga migrante sa Venezuela niadtong katapusan sa semana sa El Salvador tungod kay mga miyembro sila sa gikahadlokan nga gang sa Tren de Aragua sa Venezuela ug nagbutang sa usa ka peligro sa kaluwasan.
Ingon man nga kusganong gibarugan ni Venezuela’s interior minister Diosdado Cabello nga wala bisan usa nga Venezuelans nga gideport sa US ngadto sa El Salvador kay miyembro sa gang, diin gideklarar sa Washington nga usa ka teroristang grupo.
Gigamit sa administrasyon ang 1798 Alien Enemies Act, usa ka balaod sa panahon sa gubat, aron i-deport ang mga migrante sa rason nga sila nakahimog bayolenteng mga krimen ug nagpadalag kuwarta balik sa Venezuela.
