Gikatakdang magkita pag-balik sa White House si US President Donald Trump ug Ukrainian President Volodymyr Zelensky sa Biyernes, eastern time.
Maghisgot ang duha ka leader sa posibling sa paghatag sa Amerika ngadto sa Ukraine og Tomahawk long-range missiles nga makaigo sa mga target hangtod sa 2,500 kilometros (1,500 milya) ang gilay-on.
Gikatakda ang panagtagbo tali ni Trump ug Zelensky karong adlawa human nga gipahibalo sa Presidente sa US kaniadtong Huwebes, pagkahuman sa kapin sa duha ka oras nga tawag sa telepono sa Presidente sa Russia nga si Vladimir Putin, nga nagkasabot sila nga magkita sa Hungary sa duha ka semana, apan wala’y gihatag nga eksaktong petsa aron hisgutan ang pagtapos sa gubat sa Ukraine.
Kahinumduman nga ang unang panagtagbo ni Putin ug Trump niadtong Agosto alang sa peace summit sa Alaska natapos nga walay timailhan sa ceasefire, diin nagpadayon pa ang pagpamomba sa Russia sa Ukraine.
Samtang, si Zelensky miabot sa Estados Unidos kaniadtong Huwebes sa wala pa ang iyang miting uban ni Trump karon. Kini ang ikatulo nga pagbisita ni Zelensky sa US sukad sa Enero ning tuiga.
Sa usa ka pahayag sa iyang social media, si Zelensky miingon nga una siyang makigtagbo sa mga representante sa mga defense companies-producers sa mga dagkong armas nga makapalig-on pa sa ilang depensa ug hisgutan usab nila ang dugang nga mga suplay alang sa mga air defense system.
Makigtagbo usab si Zelensky sa mga representante sa mga American Energy companies. Kini taliwala sa padayon nga pag-atake sa Russia sa ilang sektor sa enerhiya.
Milaom usab ang Ukranian president nga ang momentum gikan sa ceasefire sa Middle East makatabang sa pagtapos sa gubat sa Russia batok sa Ukraine.
Gibulgar usab ni Zelensky nga nagdali ang Russia sa pagpahigayun ug dayalogo sa Estaudos Unidos pagkahuman nadungog ang ilang hangyo sa Estados Unidos alang sa mga missile sa Tomahawk.
