Nakahigayon si US President Donald Trump ug Ukrainian President Volodymyr Zelensky sa pagpamulong sa Vatican pipila ka minuto sa wala pa magsugod ang funeral mass alang kang Pope Francis gahapong adlawa.
Sa usa ka litrato nga gipaambit ni Zelensky sa iyang X account, ang duha ka mga lider makita nga duol sa usag usa, nga nag-istoryahanay nga wala ang presensya sa mga aides sulod sa St. Peter’s Basilica.
Gipaambit ni Zelensky nga daghan sila og nahisgutan ug nanghinaot kini sa maayong resulta nga nagtumong sa pagprotektar sa ilang mga gidumalaan nga mga tawo.
Sumala sa usa ka tigpamaba sa White House nga kauban ni Trump, ang duha ka mga lider nga nagkita nga pribado ug adunay usa ka produktibo nga panag-istoryahanay nga milungtad og 15 minutos ug ang duha nagkasabot nga ipadayon ang panaghisgot bahin sa giyera sa Ukraine.
Kini ang una nga face to face nga panagkita tali ni Trump ug Zelensky sukad sa ilang mainit nga pagbinayloay atol sa usa ka miting sa White House niadtong Pebrero, diin giakusahan ni Trump ug ubang mga opisyal sa US si Zelensky nga “ungrateful” sa suporta sa America.
