CEBU – Nimando si Tubigon Mayor William Jao sa pagsumpo sa mga scalper sa fastcraft vessel tickets nga giingong gibaligya sa pantalan sa munisipyo hangtod sa tulo ka beses sa orihinal nga presyo.
Gipagawas ni Jao ang direktiba human nireklamo ang usa ka turista batok sa giingong mga scalper sa usa ka social media viral post.
Nakakuha og 1,700 ka mga reaksyon ug 4,000 nga shares ang naasyong pamahayag nga gi-post kaniadtong Mayo 16.
Usa ka netizen nga naila nga Crest GZ ang nipaambit sa kasinatian diin siya ug iyahang kauban mopalit unta og ticket sa StarCraft vessel nga paingon sa Sugbo niadtong Mayo 16 sa pantalan sa Tubigon apan giingnan sila nga sold out na.
Pipila ka minuto ang milabay, usa ka wala mailhing tawo ang mitanyag kanila og mga tiket nga gibaligya sa tag P750 matag usa, halos doble sa orihinal nga presyo nga P380.
Matod ni Jao, nirekomendar na kini sa management sa StarCraft nga i-print ang mga pangalan sa mga pasahero sa ticket sa higayon nga ma-issue kini nga maoy standard protocol sa ubang shipping lines.
Nihulga usab ang mayor nga ipasira ang naasoyng shipping lines kung dili kini makatuman sa mando.
