CEBU CITY-Dili kidnapping inay pagpanulis ang tuyo sa mga suspeK nga nagsakay matud pa og green nga multicab van nga maoy mibira sa usa ka babae sa may Sunrise Village, Barangay Poblacion Pardo niining dakbayan niadtong Miyerkules sa gabii, petsa 4 sa Nobyembre.
Kini ang gitataw ni Konsehal Dave Tumulak ang chairman sa Committee on Public Order and Safety. Kini subay na usab sa migawas nga issue nga duna matud pa’y van nga mangidnap butang nga giklaro na sa CCPO ug sa mayor nga wala’y sama niini nga panghitabo.
Pagsaysay matud pa sa maong babae basi sa pakighinabi ni Tumulak nga nagbarog kini sa maong lugar samtang nagunit og nagtext-text sa iyang cellphone sa dihang kalit kini nga gihawiran sa usa ka lalaki. Gipatiran matud pa sa babae ang naasoy nga lalaki ug dayon midagan kini, samtang ang lalaki mibalik usab og dagan padung sa van nga green.
Basi sa statement sa babae, nagkanayon si Tumulak nga dili kadto kidnapping apan usa kadto ka tulis gumikan kay wala man mihunong ang van sa tapad sa babae ug wala man kini migukod pa.
Na-trigger lang matud pa kini human nga gipost dayon sa social media ang babae nga naghilak ug nahimo na hinoong misleading ang panghitabo. Busa, awhag ni Tumulak sa publiko nga kung naay mga panghitabo nga sama niini, dili dayon mupost sa social media inay, musumbong dayon sa dool nga police station.
Angayan usab matud pa nga i-save ang mga numero sa pulis stations aron nga dali makatawag sa otoridad sa panahon sa piligro.
