Mokabat sa 18 ka mga balay ang nadaot sa tulo ka managlahing insidente sa sunog nga miigo sa lain-laing dapit sa Dakbayan sa Sugbo niadtong Hunyo 15 ug 16, diin mibilin kini og halos P1 milyon nga gibanabanang danyos.
Ang unang sunog miulbo mga alas 4:16 sa hapon niadtong Hunyo 15 sa Gacasan 2, Sitio Upper Camparang, Barangay Kalunasan. Usa ka balay nga gipanag-iya ni Jeremil Alarde ang hingpit nga naugdaw, diin gibanabana nga mikalat og P150,000 ang danyos.
Pipila ka oras ang milabay, laing sunog ang miigo sa residential area sa Bugnay 2, Barangay Labangon, mga alas 7:05 sa susamang gabhion. Gideklarar kining kontrolado alas 7:45 sa gabii ug hingpit nga napalong (fire out) alas 8:49 sa gabii.
Sumala sa taho, nagsugod ang kayo sa balay ni Jemma Calago ug dali nga mikaylap sa silingang mga istruktura, hinungdan nga 14 ka balay ang hingpit nga naugdaw samtang upat ang nakaangkon og partial damage.
Gibanabana sa Bureau of Fire Protection (BFP) nga mokabat sa P210,000 ang danyos sa maong dapit, ug ang 14 ka pamilyang apektado ang temporaryo unang gipasilong sa Labangon Gymnasium.
Sayo sa pagkabuntag sa pagkasunod adlaw, Hunyo 16, naalarma na usab ang mga residente sa Sitio Stacionan, Barangay Mabolo sa dihang nasunog ang usa ka boarding house mga alas 4:29 sa kaadlawon.
Dali nga niresponde ang mga bombero ug gideklara kining kontrolado alas 4:50 sa buntag sa wala pa kini hingpit nga napalong alas 5:12 sa buntag.
Tulo ka balay ang hingpit nga naugdaw sa maong insidente nga gikatahong nagsugod sa balay ni Rose Doblados, diin mibilin kini og labing dako nga danyos nga mitala sa P450,000.
Tungod sa sunod-sunod nga trahedya, nipagawas og pahimangno si SFO3 Wendell Villanueva, ang tigpamaba sa Cebu City Fire Station, sa usa ka eksklusibong pakighinabi sa Bombo Radyo Cebu.
Gibutyag niya nga kasagarang ugat sa sunog nga mitumaw sa Sugbo kay nagumikan sa kuryente (electrical connection).
Hinungdan nga padayon silang nihangyo sa publiko nga magbinantayon, ilabi na sa kasamtangan nga naglagiting ang kainit sa panahon.
Sa pikas bahin, nagpadayon pa ang gihimong lawom nga imbestigasyon sa mga awtoridad aron opisyal nga masuta ang saktong hinungdan sa tulo ka managlahing sunog.
