CEBU – Patay ang tulo ka mga durugista sa gipahigayon nga drug operation sa Police Drug Enforcement Unit (PDEU) nga gipangulohan ni Police Brigadier General Remos Medina. Nahitabo ang binaylo-ay ug boto sa armas sa National Highway, Barangay Taptap, dakbayan sa Sugbo, kaganihang kaadlawon.
Una niini, usa ka buwan nga gipaubos sa surveillance ang maong mga drug suspects, diin unang gipahigayon ang operasyon sa Campo 4 sa dakbayan sa Talisay apan daling nakasibat human nga natimaho-an nga police ang ka-transaksyon.
Subay niini, dali nga gipahigayon ang Oplan Drugnet sa kapulisan ug nakig-alayon sa PDEG, kauban ang CIDG ug CCPO, ug didto naabtan ang mga durugista sa bukirang bahin sa dakbayan sa Sugbo human nga na-intercept sa mga sakop sa Highway Patrol Group (HPG).
Giingong namusil kini ngadto sa mga sakop sa HPG hinungdan sa gipahigayon nga pag-return fire ug napatay. Nakuha gikan sa mga drug suspects ang 10 ka kilo nga shabu diin nagkantidad ug 68-million pesos, duha ka .45 kalibre nga pistola, usa ka M16 firearm, ug ang buybust money nga 1.8-million pesos.
Sa pagkakarun, gisuta pa sa kapulisan ang ‘identity’ sa maong mga durugista. Sa inisyal nga nasayran, usa niini ang kanhi ‘hitman’ sa top drug lord sa Central Visayas nga si Franz Sabalones.
