BAGUIO CITY-Gisentensiyahan og reclusion perpetua ang tulo ka mga suspek nga nalambigit sa kamatayon ni Cadet 4th Class Darwin Dormitorio niadtong Septiyembre 2019.
Kini mao sila si kanhi PMA 3rd Class Shalimar Imperial Jr. ug Felix Lumbag Jr., ug 3rd Class Julius Carlo Tadena.
Sa desisyon ni Baguio City Regional Trial Court (RTC) Branch 5 Presiding Judge Ligaya Itliong-Rivera, gisentensiyahan sila og reclusion perpetua tungod sa paglapas sa anti-hazing law.
Sila si Imperial ug Lumbag pabayaran usab og P185-K nga danyos samtang si Tadena pabayron og P2-million nga danyos.
Ang Municipal Trial Court for Cities Branch 1 sa Baguio unang nagkonbikto kang Tadena sa lesser physical injuries ug Cadet 2nd Class Christian Zacarias sa slight physical injuries niadtong 2023.
Kung kahinumduman, ang 20-anyos nga si Dormitorio namatay niadtong Septiyembre 18, 2019 tungod sa grabeng bun-og nga nahiagoman sa iyang mga upperclassmen.
