LAPU-LAPU CITY-Tangtangon sa ilang trabaho ang tulo ka mga traffic enforcer sa Lapu-Lapu City Traffic Management System, kinsa positibo sa giingong paggamit og iligal nga drugas.
Mao kini ang gikumpirmar ni Lapu-Lapu City Mayor Junard “Ahong” Chan subay sa gipahigayon sa City of Lapu-Lapu Office for Substance Abuse Prevention o CLOSAP og random drug test sa 115 ka job order employees ug CTMS personnel sa atrium sa city hall.
Gikaduhaan usab kini og kompirmar ni Garry Lao, CLOSAP executive director, nga tulo ka traffic enforcers gikan sa CTMS ang nagpositibo sa drug test.
Hinuon, ang mayor miingon nga ang tulo ka mga indibidwal nga nagpositibo mamahimong magpaubos sa rehabilitation program sa CLOSAP aron ma-rehire kini human sa unom ka buwan.
Matud pa ni Chan nga niluwat usab kini og marching order sa CLOSAP nga magpahigayon og drug testing sa tanang buhatan ug departamento sa city hall, lakip na ang mga barangay.
Ang maong lakang arun mahimong drug-free workplace ang tibuok buhatan sa gobyerno sa dakbayan hilabi na nga kusog ang krimen sa maong dapit nga adunay kalambigitan sa drogas.
