LAPU-LAPU CITY-Giimbestigahan sa Kagamhanan sa Dakbayan sa Lapu-Lapu ang kamatayon sa 43-anyos nga babaye nga namatay human nisalmot sa jumping balloon activity sa Pinkys Floating Cottage Rental sa Sitio Basdako, Brgy. San Vicente, Isla sa Olango.
Nahitabo ang insidente niadtong Hulyo 11, 2024, ug ang biktima nga si Catherine Paypa Egam, turista nga taga Cagayan De Oro City, namatay niadtong Hulyo 19, 2024, samtang anaa sa tambalanan.
Nipamahayag dayu si Lapu-Lapu City Mayor Junard “Ahong” Chan, nga ang dakbayan mosusi sa maong insidente aron mapatuman ang mga lakang ug malikayan ang susamang mga panghitabo.
Subay sa imbestigasyon sa Olango Police, nasayran nga nagbuy-od sa jumping balloon si Egam dihang miambak sa pikas tumoy ang usa ka staff sa resort nga si Jford Ontong.
Una siyang gidala sa Sta. Rosa Community Hospital ug sa ulahi gibalhin sa usa ka pribadong tambalanan sa Sugbo, diin siya namatay.
Gikompirmar sa mayor nga ang Tourism Office nirekomendar sa pagsuspenso sa operasyon sa resort samtang nagpaabot sa dugang imbestigasyon ug evaluation sa kaluwasan sa maong aktibidad.
Adunay usa ka miting ang himuon sa sunod semana kauban ang tanan nga mga operator aron hisgutan ang mga pamaagi sa kaluwasan.
Sa pikas bahin, si Garry Lao, pangulo sa City Tourism Office, nirekomendar usab sa temporaryong pagpasira sa resort ug nipahibawo sa Lapu-Lapu Tourist Police ug Olango Police Station.
Siya nipasalig nga ang dakbayan dedikado sa pagpausbaw sa mga safety measures sa pagpanalipod sa mga turista ug pagmintinar sa dungog sa Lapu-Lapu isip tourist destination.
