Gikataho sa Presidential Anti-Organized Crime Commission (PAOCC), nga ang ubang top executives sa Philippine Offshore Gaming Operators (POGOs) giingong nakalusot ug mibiya sa Pilipinas.
Matud sa PAOCC nga si USec. Gilbert Cruz nga ilang gimonitor ang mga managers ug POGO executives nga wala’y record sa pagbiya sa PH airports apan gikataho nga nibiya na sa nasud.
Dugang pa sa opisyal nga dili nila ma-account ang pipila ka mga pribadong tugpahanan nga gitukod sa mga indibidwal. Matud pa niya nga adunay daghang pantalan sa tibuok Pilipinas nga legal ug ilegal.
Hinungdan nga problema nila kini ang mga dili rehistrado nga mga pantalan, nga ang uban gitukod sa mga lokal nga politiko.
Kalabot niini, ilang gi-verify kung rehistrado ba sa Philippine Ports Authority ang pantalan sa Sual, Pangasinan.
Gikumpirmar usab sa opisyal nga si Alice Guo adunay interes sa negosyo sa Sual.
